【學系架構】

l   大學部

 設立於2013年8月。配合《客家基本法》摎《國家語言發展法》建構國家整體政策个方向，對111學年度開始，大學部分做「客家語文摎傳播組」摎「客家社會摎政策組」，培養學生仔愛有客家語言文化摎社會科學學科个基本能力，希望學生仔變做有多元文化、公共視野摎國際觀个客家人才。大學部个課程規劃重視基礎學科理論个建立，提供學生仔跨學科个基礎訓練，教學方式強調創新、多元、實用，為學生仔入去就業市場摎從事客家研究做準備。

l   客家語文碩士班

 對2004年8月成立，係全國第一間專門以客家語文做主要研究个學術單位，培養學生仔變做有客家語文保存、研究、推廣、教學等能力个人才，共時做得進一步變做本土語文研究摎教學个專才。因為客家語文研究係客家研究底肚做毋得攉忒个部分，本班分做客家語言摎客家文學研究兩隻方向，客家語言研究鑽研客家話个音韻、詞彙、文字摎語法，客家文學研究係研究客家个傳統文書、現代文學摎民間文學，這幾年還有發展到客語教學等研究領域。

l   客家社會及政策碩士班

 本系對111學年度開始，摎原來个客家社會文化碩士班、客家政治經濟碩士班整合變「客家社會摎政策碩士班」。除忒培養學生仔宏觀思維，變做有國內摎東南亞客家社會文化相關議題整合能力个人才，乜對政治經濟角度推動客家議題个研究，以族群政經關係、第三部門、客家文化產業三大重點，培養客家政治摎經濟專業研究、客家公共視野个政策分析、人文關懷摎產業創新个管理等人才。

l   客家研究碩士在職專班

 2006年8月成立，分該兜對客家事務有高度熱忱个社會人士一隻在職進修个方式。本班課程設計多元，強調多種科目个整合，鼓勵無共樣个學科領域摎經驗取向个人才報名。本班目的係培養理論摎實務兼具个客家研究摎行動實踐人才，希望符合客家社會對客家社群發展摎發揚客家文化个需求。

l   客家研究博士班

 對2011年8月成立，係全國第一隻用客家研究做名仔个博士班，本班目標係提高摎深化客家研究學術人才个培養教育，建構用客家為主个研究論述，拓展客家研究个多元族群關係摎公共事務關懷个觀點，進一步強化本系摎臺灣人文社會科學研究分世界看到个可能。