國立中央大學係國内盡優秀个大學，有豐沛个學習資源，加上摎陽明交通大學、清華大學、政治大學建立臺灣聯合大學系統，結合四隻學校教學研究量能，整合資源、發揮互補性，提供學生還較優質摎多元个學習選擇。

　　客家語文暨社會科學學系(下背安到本系)設立於2013年8月，包含大學部、碩士班、博士班等學制，從基本个客家語言文化摎社會科學能力訓練，到培養有客家研究个專業能力，完整建立高等教育機構客家人才培育个系統，乜積極推動「五年雙學位制」（學士、碩士學位），縮短學生仔修業年限，希望佢兜較早兜去到職場也係續等讀書。

　　「客家心．新客家」係本系个發展主要重點，強調「用心」關懷客家事務，用創新个觀點表現客家文化新个特色，用「客家心」共下創造「新客家」，厚植客家文化永續發展个能量。

　　本系有語言、文學、社會、文化、政治、經濟、政策、法律各學術方面个師資，開各類跨領域个課程，提供同時有理論摎實務个教學摎研究。另外，乜重視摎海外客家社團摎國際客家研究、人文社會科學研究社群个接觸，經過各類研究計畫、學術會議、客家籍企業家獎助等，增加國際互動摎交流，加強學生仔掌握時事脈動能力摎拓展國際視野。

　　本系个教學摎研究空間，主要在學校个客家學院大樓。大樓在中大湖脣頭，風景當好，還過有完備个教學設備、特色館藏書籍等，做得分學生仔一隻優質、舒爽、快樂个學習位所。